BIMBINGAN PJJ 22-27 APRIL 2018

                       Ertoto alu pusuh meciho (Matius 6:5-8)

Ertoto entah pe berdoa eme hal si enggo kel si tandai ibas kalak Kristen. Pertoton ntah Doa ibas Kamus Besar Bahasa Indonesia eme permohonanan, harapan, permintaan dan pujian kepada Tuhan. Sienda ngatakenca maka pertoton la ngenca erkiteken lit keperlun saja tapi guna muji-muji Dibata selaku sierkuasa. Si jadi bahan perenungen ibas PJJ minggu enda eme kerna uga kin pusuhta ibas kita ertoto, kai motifna, janah sie teridah ka ibas sikapta ertoto man Dibata.

Matius 5-7 eme bagin ija Yesus ngajar I datas uruk man kerina jelma sienterem sir eh tupung sie. Yesus ngajar kerna hal-hal si praktis, si rusur lakoken kalak sienterem tapi melala denga motif ras si perlu I pesikap ras ipelimbarui. Iajarken Yesus me kerna ertoto, perjabun, kesirangen, sen ras kebiaren/kearunate. Ibas bagin 6:5-15 eme ngajarken kai si ibanci ilakoken ras si labanci lit ibas kalak si ertoto.

Lit dua hal si labanci lit ibas pertoton man Dibata eme:Sipemena Ertoto ula bagi kalak si pekulah-kulah. Ibas bahasa Indonesia ikatakenna eme munafik. Kalak si pekulah-kulah siertoto irumah-rumah persembahen bagepe isimpang-simpang gelah idah kalak. Kai si ikataken Yesus labo inganna si salah sebab rumah pertoton eme memang ingan ersembah ras ertoto man Dibata. Tapi siikritik Yesus motif kalak pekulah-kulah si tempa empermuliaken Dibata tapi situhuna ndarami kemuliaan guna dirina jine, eme gelah iidah kalak. Persimpangen dalan eme ingan si rusur ras pasti ibentasi kalak, ku jah me ia erdalan tempa-tempa ngatakenca maka lit dorongen guna ertoto si lanai tertahanca she maka tupung bas perdalanen pe ertoto man Dibata. Ndauh terbagesen igar-gari maka kalak si ertoto gelah iidah kalak eme erkiteken ia perlu pujin ibas kalak nari kerna pertoton si ibahanna. Banci gelah iidah rusur ertoto ntah gelah iidah kalak beluh ia ertoto, ntah gelah iidah kalak maka ia kalak erkiniteken/Kristen. Sipeduaken ertoto ula mulih-ulih bagi kalak si nandai Tuhan. Ibas bahasa Indonesia isterjemahken alu kata jangan bertele-tele. Ibas bahasa aslina iterjemahken alu kata berbicara tak menentu si iibaratken sada mesin penjawab otomatis si sungkun secara otomatis jabab penungkunen e. Ibas ertoto perlu lit hubungen pribadi ras Dibata. Kalak si la erkiniteken erpengakap maka adi nggedang ia ngerana, ibegiken Dibata me pertotonna. Kata-kata e perlu nge, tapi si terjadi ibas kita ertoto secara komunal(bersama-sama) kita selaku kalak Kristen si maba pertoton kita tergoda guna encidahken kosa kata si mejile si lit ibas kita, emaka sie me si ipersingeti Yesus. Siitegur Yesus eme ibas pertoton kalak si la erkiniteken eme guna mementingken kerja mulut saja tapi la ersembah alu pusuh si tepat/meciho. Maka ertoto labo soal uga kita merangkai kata-kata si mejile ras mantap gelah entabeh iakap kalak megikenca ertoto. Janah kalak si la entabeh pe kosa kata ibas ia ertoto labo ka menentuken pertoton e ialoken Dibata ras lang.

Lit telu hal si arus lit ibas pertoton man Dibata: sipemena, adi ertoto bengketlah ku bas kamarndu, Dibata si ngidah perbahanenndu. Si iterjemahken selaku kamar labo secara harafiah, tapi eme Kamar ija kalak si la banci ngidahsa eme pusuhta sekalak-sekalak.Ertoto eme hubungan pribadi ras DIbata. Ibas pusuhta nari me motifta ertoto, sebab labo lit pertoton si la iperdiateken Dibata. Janah erkiteken si la teridah eme kita ngalo upah. Sipeduaken,la perlu mulih-ulih sebab enggo leben ieteh Dibata kai siiperlukenndu. Sienda si tuhuna ngingetken ka ibas kegeluhen nabi-nabi Baal si ersembah man Baal alu susah/latih. Ija mulai erpagi-pagi seh tengah berngi ia ertoto alu ngulang-ngulangi kata “Ya Baal jawab min Kami ya Baal, jawab min kami” tapi sia-sia me pertotonna e. bagi Elia si ngelawan nabi-nabi Baal si ertoto alu teneng ras sabar si ertoto alu singkat janah ibegiken Dibata. Kinilatihen ibas biber alu pertoton jadi usaha si sia-sia adi la kin ibas pusuh ras kinitekennta nari. Lit sada penelitian I Praha si ndatken sada angka-angka si menarik kerna percakapen si icakapken ibas kegeluhen ibas sada wari. Sekalak pendeta ngerana 3420 kata, prajurit I asrama 7420 kata, pelajar SMP 8.760 Kata, Sekalak ndehara 15.300 simelalana eme ibu mertua 19.800 kata. Sipeteluken dage bagendalah ninndu ertoto. Ije Yesus ngajarken cara ertoto man jelma sienterem e, gelah la bertele-tele ras kerina unsure pertoton lit ije, sipemena eme kap pertoton e itujuken man Dibata, guna mpermuliaken Dibata. Kalak siertoto eme kalak si erpenggejap maka Dibata me si meganjangna ibabo doni enda, emaka ibas pertoton lit sikap erpengendes man Dibata sebab peratenNa ngenca jadi ibas doni enda bagepe I surga. Ibas pertotonnta si pindo Tuhan mereken kejuah-juahen man bannta ibas wari enda. Sebab wari enda me ngenca si ieteh ras siinanami kita tapi wari si pepagi labo sikerajangennta. Janah pe sigejapken ka kekurangennta selaku manusia maka lit kesalahen siilakoken kita man Dibata bagepe man kalak sindeban. Emaka ibas pertotonnta pe kita perlu mindo pengampunen gelah Dibata ngalemi salah ras kelepakennta. Janah pemindonta pe gelah DIbata si mpedauh kita ibas mara bahaya nari sebab ia me si mada kuasa ras kemulian she rasa lalap.

Aplikasi

1.       Ertoto ibenaken alu penggejapen maka Dibata me si mada kuasa si meteh isi pusuh anak-anakNa.

2.       Ertoto erkiteken hubungen pribadi ras Dibata.

3.       Kata-kata si ibelasken tupung ertoto labo ibahan-bahan tapi erkiteken reh ibas pusuh nari.

4.       Pertoton labo ka guna kepuasen kalak sindeban tapi kepuasen isi pusuh erkiteken enggo ngerana-ngerana ras Dibata.

BIMBINGEN PJJ 8-15 April 2018

Sukat-sukat peminpin si ngena ate Dibata

(Ulangen 17:14-20)

Kata Perlebe

Adi siinget ± 1 Tahun si lewat kerna kasus sekalak peminpinnta eme nuriken kerna oknum-oknum siipake ibas surat Kitab Sucina maka gelah piga-piga kelompok la milih kelompokna jadi peminpin. Situhuna adi sigar-gari ka dasar ayat gelah kita Kalak Kristen la milih si berbeda agama ras kita pe banci ka jadi kasus si serupa. Tapi si jadi dasar pemahennta ras siilakoken kita ibas ndalanken sistem kepeminpinen eme tafsiran prinsip kata Dibata, labo ngenca terjeng harafiah/hurufiah semata. Emaka, erkiteken sie perlu ka kita meteh konteks penulisen kitab Ulangan selaku kitab sejarah. Ibas minggu enda, kita erlajar kerna uga kin sukat-sukat sekalak peminpin si ngena ate Dibata si arusna pe sieteh arah kata Dibata nari.

Isi

Ulangan eme kap kitab si asalna ibas cakap Yunani nari siertina hukum si peduaken. Si enterjemahken kitab Perpadanen Sindekah ku bahasa Junani (Septuaginta) erpendapay maka “salinan hukum Tuhan” e ikataken ibas Ulangen 17:18 eme salinen kita undang-undang/hukum sipeduaken. Amin bage gia, maka Ulangen labo perlu ipahami selaku hukum sipeduaken, tapi eme kap penuriken mulihi ntah pembaharuan kerna hukum-hukum  si ibereken Dibata man Musa i Deleng Sinai. Adi ibas bahasa Ibrani ikataken “enda me ranan-ranan (siibelasken Musa)” enda pe banci jadi pemahamen si tepat sebab isi kitab enda eme rangkaian pidato Musa man Bangsa Israel ope denga ia mate.

Ibas Ulangen lit dua bagin Hukum, eme sipemena pasal 5-11 ibenaken alu 10 perentah Dibata, emaka iikutken alu khotbah kerna pentingna perentah sipemena ras kewajiben bangsa Israel guna nembah Dibata saja. Sipeduaken eme pasal 12-26 kerna hukum-hukum keagamaan, sosial, sipil, kriminal si arus ipatuhi sedekah i taneh perpadanen. Pasal 27-28 eme kerna upacara khusus ija umat Israel setuju guna nggeluh sue ras ketetapen-ketetapen Dibata.

Tupung Bangsa Israel i taneh Kanaan, ija melala kekuaten bangsa Asing reh guna ngancam ia. Emaka Dibata milih peminpin khusus man bangsa Israel guna ngelawan musuh-musuhna. Tapi bangsa Israel tetap mindo sekalak raja guna jadi peminpinna (1 Sam 8:4-22).

1.        Kalak Siipilihndu atendu eme kalak si nggo ipilih Tuhan

Ibas Dibata milih sekalak peminpin, lit Kriteria Khusus siibahan Dibata guna jadi kalak pilihenna. Sipemena maka Dibata la pernah ngenihen rupa, tapi Dibata ngenihen pusuhna (1 Sam 16:7), sipeduaken Dibata pe ngenin uga perbahanen sekalak jelma, uga ia ersembah man Dibata bagepe lagu langkahna.

2.        Arus bangsa ndu nari, ula bangsa si ndeban.

Bangsa Sindeban si imaksudken Dibata tupung sie la banci jadi rajana erkiteken bangsa Israel ngenca si iperentahken Dibata jadi bangsa si Badia si ersembah man Dibata saja ngenca. Sedangken bangsa sindeban ersembah man gana-gana. Emaka siisuruh Dibata eme calon si kin erkiniteken man Dibata ngenca.

3.        La banci melala kudana

Kuda eme simbol sekalak si gagah, kuda eme simbol peperangen, sebab kuda ipake tentera guna erperang, emaka la banci melala kudana gelah ula ka min jadi sumber perang nandangi bangsana ras bangsa sindeban. Bagi Yesus ka pe si make kelede selaku simbol kedamen, labo kuda si jadi simbol peperangen. Ayat enda eme menyinggung kegeluhen Salomo (1 Raj 10:26)

4.        La banci nuruh rayatna nukur kuda ku Mesir

Enggo ituriken pe maka bangsa Na la banci mulihken ku Mesir.

5.        La banci melala ndeharana

Tupung erbahan sada perjanjin, raja banci erjabu ras anak diberu raja sindeban. Diberu-diberu asing e biasana ersembah nandangi ilahna, janah erpengarapen perbulangenna pe ersembah ka man dibata-dibatana. Enda ka nge si terjadi ibas kegeluhen Salomo (1 Raj 11:1-13) ras raja-raja sindeban.

6.        La banci ipebayakna bana alu pirak/emas.

Sekalak raja arus maka metenget nandangi hal-hal sierbahanca ia nundalken Dibata ras kinitekenna.Kekayaan, kehormatan dan kesenangan, tiga halangan besar dari kesalehan daging, kelopak mata dan kebanggaan hidup (Riches, honurs and plesures, are three great hinderances of godlines (the luts of the flesh, luts of the eye and the pride of life))

7.        Ibahanna sada salinen undang-undang ras pengajaren Dibata. Kitab e arus ndeher ras ia ras iogena gedang-gedang geluhna.

Selaku sekalak raja, la ka bias terjeng meteh undang-undang saja, tapi undang-undang e ipakekeken, janah jadi penuntun geluh ras kepemimpinenna. Enda me si ngajarken sekalak raja mehamat man Dibata janah la ka kitik akapna kalak sindeban. Undang-undang ras pengajaren Dibata e ka nge erbahanca kepemimpinenna ngaruh seh ku bas keturunenna/anak-anakna.

Aplikasi

            Ipilih Tuhan jadi sekalak peminpin eme sada hak si istimewa. Situhuna peminpin la ngenca ku bas negara enda, tapi jadi peminpin itengah-tengah jabu ta sekalak-sekalak, pemimpin i tengah gereja ras itengah-tengah masyarakat. Arus kita metenget maka ula kita sempat nilah ibas aturen ntah standar si itetap ken Dibata man kalak si enggi ipilihNa. Ula siandalken gegeh kepentaren si lit ibas kita.

            Bagepe ibas kita milih sekalak peminpin, secara prinsip perlu si pilih eme kalak si meteruk ukur janah ndalan ken sura-sura pusuh Dibata. Labo erdahin erkiteken kepentingen pribadi ras kelompok saja ngenca. Sebab kita nggeluh la ibas masyarakat si sada pemahamen/sada kiniteken. Labo ka banci terjeng memihak sada pihak janah la ngukurken pihak sindebanna ka.

            Kekuasaan tanpa keadilen eme pemerintahan lalim (bengis, kejam, tidak adil, tidak berbelas kasihan. Keadiken tanpa kekuasaan eme pemerintahen si idealistis. Emaka marilah pentar kita erbahan sukat-sukat milih peminpin bagi singena ate Dibata.

Pdt Frebin Thearona  Br Tekang S.Si Theol